സംസ്ഥാനത്ത് ക്ഷേമ പെൻഷൻ തട്ടിച്ച്‌ സർക്കാർ ജീവനക്കാർ. 1458 സർക്കാർ ജീവനക്കാർ സാമൂഹ്യ സുരക്ഷാ പെൻഷൻ കൈപ്പറ്റുന്നതായി കണ്ടെത്തി.
ഗസറ്റഡ് ഉദ്യോഗസ്ഥർ, കോളേജ് അസിസ്റ്റന്റ് പ്രൊഫസർമാർ ഉള്‍പ്പെടെയുള്ളവരാണ് പെൻഷൻ കൈപ്പറ്റുന്നത്. ധനവകുപ്പിന്റെ നിർദേശപ്രകാരം, ഇൻഫർമേഷൻ കേരളാ മിഷൻ നടത്തിയ പരിശോധനയിലാണ് തട്ടിപ്പ് കണ്ടെത്തിയത്.
അനധികൃമായി കൈപ്പറ്റിയ തുക പലിശയടക്കം ഉദ്യോഗസ്ഥരില്‍ നിന്ന് ഈടാക്കണമെന്നാണ് ധനവകുപ്പിന്റെ നിർദേശം. കുറ്റക്കാർക്കെതിരെ കർശന അച്ചടക്ക നടപടി സ്വീകരിക്കണമെന്നും മന്ത്രി കെഎൻ ബാലഗോപാല്‍ നിർദേശിച്ചു. തട്ടിപ്പ് നടത്തിയ രണ്ട് അസിസ്റ്റന്റ് പ്രൊഫസർമാരില്‍ ഒരാള്‍ തിരുവനന്തപുരത്തെ സർക്കാർ കോളേജിലും മറ്റേയാള്‍ പാലക്കാടുള്ള കോളേജിലുമാണ് ജോലി ചെയ്യുന്നത്.
ഏറ്റവും കൂടുതല്‍ തട്ടിപ്പ് നടന്നത് ആരോഗ്യവകുപ്പിലാണെന്നും കണ്ടെത്തിയിട്ടുണ്ട്. 373പേർ ആരോഗ്യവകുപ്പിലും 224പേർ പൊതുവിദ്യാഭ്യാസ വകുപ്പിലും 124പേർ മെഡിക്കല്‍ എജ്യൂക്കേഷൻ വകുപ്പിലും 114പേർ ആയുർവേദ വകുപ്പിലും 74പേർ മൃഗസംരക്ഷണ വകുപ്പിലും 47പേർ പൊതുമരാമത്ത് വകുപ്പിലുമാണ് ക്ഷേമ പെൻഷൻ കൈപ്പറ്റുന്നത്.
